|
März |
Wie dä Pastue em Bichstohl laache moot Et woe vüe 70‑75 Joohr. Ännche
woe ze Kommuniuen jejange. Dat woe ejendlich en jot Saach, nur dat Bichte,
jo, dat woe kompliziert. Watt me
bichte moot, soot die Motte. Am Gelee schnorre, eene von dä jode Äppel
stibitze, die kleen Jeschwiste zänke usw. Die Motte soot: "Dat jehüet
sich net, dat moss due bichte". Ännche sooch jo en, datt dat Onräech
woe, dat et äwwe och e Ledche bichte soll, konnt et net vestoon. Ännche konnt jot senge. Do hatten
die jrueß Männ et e schön Ledche jelieet. Et konnt sich ja net denke, watt
dodraan Sünd senn soll. Äwwe seng Motte hatt jesooht. "Dat jehüet sich
net füe e Mädche", also moot et jebich wäere. Pastue woll en dä Bich hüere, watt
dat füe e Ledche wäe, watt su schlemm senn soll. Opsoon konnt Ännche dat
Ledche net, et konnt et nue senge. Also song et em Bichstohl. "Die
hölzere Popp, die hölzere Popp, die hätt keene
A…… on och keen
Fodd, fiderallala". Ännche krech die Lossprechung. Et
wieet äwwe jesooht, Pastue hätt benet dä Bich hoste mosse, als wenn äe sich
veschluck hätt, veliech vom Laache. Ännche hätt deheem jesooht, wie dat met
dä Bich jewäes wäe, on datt dat Ledche ja keen Sünd jewäes wäe. |
|
Datt hätt noch ens jot jejange Wann me als aahl Frau üss dä Eefel
no Kölle fährt, es dat emme e kleen Abenteuer. Om Haupbahnhoff, op dä
Huhstrooß on op dä Schelderjass wimmelt et nur su von Mensche. Wann me Jlöck
hätt, treff me ne Kölsche, dä me jett frore kann. Die senn och mieeschtens
fröndlich on hellefe eenem widde. Ich jelle mie emme e paar
Strooßebahnkaate zesaame. Wann ich die net all bruche, verwahre ich die bes
et nächste Mool. Dann kann ich üss däm Zoch stracks en die Ubahn steje. Su
och em Fröhjoohr. Ich hatt noch e paar Kaate vom letzte Joohr. Wie ich die Kaat
am Automat en dä Ubahn entwerte woll, klapp dat net. Ich woe e besje konfus,
dat hatt doch emme jeklapp. Do koom och att ne Mann, dä soot: "Ihre
Fahrkarte bitte." Ich zeech em meng Kaat on soot, ich wöll die jrad
entwerten. Du soot dä Mann: "Ihre Fahrkarte ist ungültig. An der
nächsten Haltestelle steigen Sie bitte mit mir aus." Jetz merk ich, datt dat ne Kontrolör
woe. Die Strooßebahn klag jo emme öwwe die jrueß Verluste dörch die
Schwatzfahrer. Wann ich och net die Absich jehatt hatt, schwatz zu fahre, ich
hatt meng Kaat jo et letzte Mool jekoof, su moot ich doch met üsssteeje. Zwei
Kontrolöre on ich. Ich jlöwe, su sitt et üss, wenn me vehaff wieet. Su
ähnlich woe et mie och. Om Bahnsteich moot ich menge Pass
zeje. E Jlöck, dat ich däe öwwehaup debej hatt. Do woere noch zwei Fraue, dat
woere och Kontrolöre. Ich vezool, wie dat met dä aahle Fahrkaat woe.
Jlöcklichewies hatt ich noch die Kaat üss dem Zoch, dat ich jrad von Öskerche
konn woe. Een von dä Fraue, en Kölsche, meent, et lohnt doch janet, dä Saach
no ze joohn. Ich soll die aahl Kaate zerisse on am Automat nöye holle. Su eefach es dat äwwe net met dämm
Fahrkaate‑Automat. Von vier eenzelne Mark woe dämm keen jot jenoch. Drei jong Löck konnten och keen
Kaat erüss kreje. Eene soot: "Verdammt", dä anne soot: "Sch
... e", on dä drette soot: "Blöde Automat." Also heel dat net
aan mie, wie ich meent. Die Saach woe füe mich noch ens jot jejange. Vier weiche späde koom ene Breef.
Oewe dröwwe stonn: »Kölner Verkehrsbetriebe". Ich hätt die 40.Mark,
"erhöhte Beförderungsgebühr“ net bezahlt. Su nennt sich die
Stroof, wann me keen jültjge Fahrkaat hätt. Die 40 Mark wäre jetz fällich, on
10 Mark Mahnjebühr. Jetz wue die Saach füe mich äesch, wo ich doch nett wesse
konnt, dat die Fahrkaate jrad en däe Zitt opjeschloon woere. Ich woll doch kicke, off me do nex
draan maache könnt. Meng Bekannte meente zwar all, dat notz dich nex. Die
Beamte kreje su vell ze hüere, die jlöwe keenem e Woet. Die ärbede no Schema
"F", wäe keen Kaat hätt, bezahlt. Die sen rigoros. Die 50 Mark doot ich an en Sitt
läje. Füe alle Fälle. Dat woll ich doch wesse. Mie jeng et öm et Prinzip. Ich
wollt doch keene betuppe. Also schreff ich, wie dat met mie jejange hatt.
Äwwe wadraan? Aan die Kölner Verkehrsbetriebe? Dat es e jrueß Huus met vell Büros
on vell Beamte. Aan dä Vorstand? Dat sen drej Häere. Wäe es do däe richtige
füe meng Problem? Dann bliev noch der "Vorsitzende des
Aufsichtsrates". Off dat e ärch hu Diee es? Off däe menge Breef öwwehaup
lässe deet? Dadraan schreff ich. Däe hät menge Breef sujar beantwoet.
Däe hätt jeloov, watt ich jeschrewwe hatt und "betrachtet die
Angelegenheit als erledigt. Mit freundlichen Grüßen." Do meene vell Löck, op dä Büros wäre
nur Bürokrate, die no Paragraphe ärbede dääte. Äwwe die haan och e Hätz, e
Jemöt on anscheinend sujar ne jesonne Menschenverstand. Bey dä Kölner Verkehrs-betriebe sen och suen
Beamte, jlöcklichewies. |
|
Nur ee Paar Schoon Bejm Kroome en aahle Papiere fonn
ich e Beldche. Ich kenne zwar keene dodrop, trotzdem kött dat Beld mie
bekannt füe. Do setze 9 Pueschte schön en eene Rejh, wie dat bej Belde füe de
Scholl jemääch wieet. Se setze platt om Boddem on stippen de Schoon nohm
Fotojrafen. Me konnt bahl meene, die Schoon wären die Haupsaach op demm Beld.
Die haan ich mie aanjeseehn, suen Schoon hann ich och noch aanjedoon. Dat woere jenählte Schoon. Die Nähl
hatte ne kuete Steff on ne decke Kopp. Däe decke Kopp soll vehööde, dat die
leddere Lappe su flöck dörchjeloofe woere. Ich kenne dat noch. Dat jeng
och en Zitt jot. Dumols woere die Strooße äwwe rubbelig, do woere Steen on
Lauche. Dann woere die Nähl doch flöck
affjestrupp oder veschlesse. Dann moot me die Nähl bejschloon oder die Schoon
bej däe Schoomäche bränge. Wann dat net jedoon wue, woeren se flöck dörchjeloofe.
Wann die Schoon eenem ze kleen woere, jengen se aan eene van denn Jeschwiste.
Dann heesch et männichmool: "Pass jett op die Schoon om. Die könnt oss Pitte noch droon". Äwwe dat
klapp selde. On schwer woeren die jenählte
Schoon. Do
blevv et net üss, dat me ne stiewe, schwere Jank krech. Die moot me su lang
aandoon, wie et jeng. Dann woeren se off vell zu kleen. De mieeschte Kenne
hatten nur dat eene Paar Schoon. En
dämm Joohr, wo se zu Kommunion jenge, wure die Nähl äwwe nohm Fess da dren
jeschloon. Wann die Schoon bejm Schoomäche woeren, konnte vell Kenne net en
de Scholl joohn. Dat woe janz schlemm bej Kenne, die op e anne Dörf en de
School oder en de Kerch joohn moote. Su e Beldche met jenählte Schoon
bränk eene op allerhands Jedanke. Ich denke draan, wie eene soot: "Heff
die Been ob, strupp die Schoon net. Däe Schoomäche es noch net vom letzte
Mool bezahlt." |
|
Datt Krütz en osse Stovv En moderne Wahnunge sitt me koom
noch e Krütz. Höchstens e kleenet, watt net opfällt. E Zeeche, dat me noch
katholisch es. Löck meene, met nem Krütz aan dä Wand höllt me sich e Krütz en
et Huus. Meng Erfahrung es annesch. En menge Stovv hänk e Krütz von mengem
Vatte. Domet es et su. 1918 es meng Motte jestorve. Mie
woere zu drej Kenne. Ich woe 6 Joohr alt on ich haan späde ieesch bejreffe,
wie schwer dat och füe me Vatte woe. Drei Daach no Motte sengem Bejräfnis
koome englisch Soldate als Enquatierung. Die botzte owends en osse Stovv die
Jewehre. Aan däm annere Enn von dä Stovv sooß me Vatte on fleck meng Schoon. En däm Moment, wie me Vatte sich
stelle doot, jeng üss eenem Jewehr ne Schoss aff. Die Kuggel troff me Vatte
op de Botzeteisch. Do schlooch se von nem Schlössel dä Baat aff on prallt aan
nem iesere Jeldstöck aff. Wann die Kuggel ne Moment fröhde aff jejange wäe,
hätt se me Vatte en de Bross troffe. Net üsszedenke, watt dann passiert wäe. Sitt dä Zitt hänk en osse Stovv am
Krütz en Kuggel on ne Schlössel oone Baat. Ich weeß, datt dat Krütz aan dä
Wand on dä Jlaube aan däe, däe dodraan heng, mengem Vatte em Lewwe Trues on
Höllef woe. Ich haan en schwere Zidde och die Erfahrung jemääch. |
|
Wie woe die aahl Zitt? Die Ansichte sen su verschieden wie
die Mensche. Me kann net soon, dä hätt räech on dä anne hätt onräech. Su woe
et och, wie öwwe die aahl Zitt jesprauche wue. Bey demm Thema jenge die
Ansichte janz üssenanne. Oma einz
meent, die aahl Zitt wäe jot jewäes. Oma zwei soot, dat stemp net, se
hätt dafüe zich Beweise. Äwwe su eefach es dat net, wenn me
öwwe Zitt spreiche well, jede erlävv die Zitt jo annesch. Dä Jeburtstag es
däm eene ne jode Daach. Ne annere hätt an dämm Daach e Mallör. Füe däe es dat
ne schläechte Daach. Wenn et em Urlaub aach Daach rähnt,
es dat füe däe Urlauber schläech, füe ne Bue, däe ärch dadrop jewaat hätt, es
dat jot. Me kann janet soon, een Zitt es jot oder schläech. Wie woe
dat bej Oma einz? Als Kend hatt se e
schön Elternhaus jehatt, die jong Joohre woere net üppig, äwwe ohne Sörch.
Nohm Hieroode hatt ihre Mann alles, watt net su schön woe, von ihr
affjehaale. Oma einz hatt ihr aahl Zitt werklich als jot Zitt erläww. En däeselbe Zitt hatt Oma zwei en
schwäe Kendheet jehatt. Die jong Joohre hatte nex Jots bräch, on noom
Hieroode hatt se bloos Ärbed on Sörch jehatt. Nee, füe Oma zwei woe dieselbe
Zitt, die füe Oma einz jot woe, schläech. Su wie männichmool öwwe die aahl
Zitt jesprauche wieet, hätt die nie existiert. jlöcklichewies wieet dat
Schläechte üss ner Zitt off vejeiße. En Erinnerung bliev dann bloos noch dat
Jode üss dä aahle Zitt. |