Em Kalender stonn: „20.3. Fröhlingsanfang“. Me merk äwwe nex devonn. Bej 500 Meter öwwe NN es de Boddem noch jefrore. Hee on do lett noch e Hööfche Schnie, dreckig on jrau. E Zeeche, datt et noch kalt es. Ich sen ens dörch et Feld spaziet, off me do noch nex vom Fröhjoohr merk. An däe Hecke sitt me noch nex, et kött noch kee Bläatche. Bloß die Wegge schecke die Kätzche erüss füe zu kicke, watt loss es. En däe Luff woe äwwe jode Betrieb, doof woe jett loss. Et koome jrueß Kette Schniejänse, die hüet me att schreje, dann sitt me se noch net. Se konn en Keilform, wel se sich dobej an däe Spetz affwääßele, datt es die schwerste Platz en de janze Kette. E paar Schwärm sen äwwe lang em Krees jefloeje, als wenn se net wösste, wie et widde jeng. Off se de Kompass oder de Kaat velore hatte? Veliech traut keene sich aan die Spetz. op eemool waren se sich doch eenich on formierten sich zo nem Keil, wie et sich jehüet, on ab en Richtung Nordosten. Se haan noch en schön Streck füe sich. Se welle jo an däe Polarkreis, do kann me bloß jode Fluch wönsche,

SuwItt welle die Kiebitze net, die Ich jeseehn haan, E paar jrueße Schwärm. Me kennt se aan demm wieße Buch, däe me männichmool sitt. Die sen net su ielig on holle sich Zitt füe jett ze freiße. Die welle jo och bloos no Norddeutschland oder Skandinavien. Do lääjen se die Eier on trecke die Jonge op. Bej demm Spazierjang haan ich och die ieeschte Lerche jehuet, dann moss et Fröhjoohr konn, Me moss äwwe och noch met ner Schue Schnie reichene. Die Lerche senge och dobej noch. Datt haan ich off jehuet, Lerche hüere en et Feld. Schlemm wann ens keen mie doof wäre. Bey dem velle spritze em Feld sen Ich dafüe bang. Hoffendlich konn se noch lang en oss Jäjend zeröck, Wie ich en et Dörf zeröck koom, sooß em Boom en Amsel on flöt e schön Leed. No jo, wann se domet en Frau söök, moss se sich och anstrenge. Ich haan ihr en Zitt zojehuet als wenn datt Ständche füe mich wäe. Die Meise, die de janze Wente bloos jesorch haan, datt se satt wuere, sen jetz janz annesch. Se flitze dörch Hecke on Bööm on roofe: “Pink, pink". Domet sööke se en Frau. Ich denke, datt die richtig Meise datt hüere on Antwoet jänn. Och die Mösche sen annesch wie em Wente. Se spelle en de Hecke on sen janz löstig. Wenn se och bloß "schtilp, schtilp“ roofe, su wäre die Möschemädche datt doch vestoon on Antwoet jänn, Die Schniejlöckche sen och att doof. Et Fröhjoohr kött, et lött sich net mie ophaale. De Kalende hätt räech,