|
Bej aahle Löck wieet off öwwe die
Jong Joohre jekallt, wo alles schöne, alles annesch, öwwehaup alles beiste
woe. Me söök ne bestemmte Jeruch, on fend en net. Me söök däe Jeschmack von
Bocksbart on Sueampes, däe hätt me net mieh. Me vesöök die aahle Lede ze
senge, die haan keene Klang mieh. Ich denke an' Tant Sett seng Äppel on aan
Schmedte Will seng Klotzberre, die äe männichmool öwwe däe Zong rek, däe
Jeschmack wöll ich doch noch ens op däe Zong haan. Ich
denk aan schwatzblau Krekele on aan Jrasüle, dann lööf miee höck noch et
Wasser em Mond zesaame. Ich denke an menge ieeschte Pudding vüe 65 Joohr. Däe
woe von Jreesmäehl, met Himbeersaft. All die jot Saache die höck jekauch
wäere, senn nex dajänt. E Weckstöck
met Honnich es höck och net mieh, watt er fröhde woe. Wiesu fend me datt all
net mieh? Me söök jo ejendlich Jätt Janz
annesch. Me söök die jong Joohre, me söök die Kennezitt on meent, met denn
Saache könnt me die noch ens zeröck roofe. Äwwe die kann me net zeröck roofe.
Watt me dobej fend, jefällt eenem net, datt es lang ne su schön, wie dumols.
Me es kee Kend mieh. Erinnerunge kann me net nooholle. Me kann äwwe dran
denke. Datt moss eenem jenoch sen. Ens vezool eene miee schön
Stöckelche. Köbes hat jehieroot. Äe hätt en fließich, düchtich Frau kreje.
Seng Frau konnt jot kauche, bloß däe Ruedekappes schmäch net esu jot wie bei
senge Motte. Do soot äe emme: "Äe hätt net de Jeschmack wie bei Motte
seelisch". Seng Frau frooch att en däe Noobeschaff, wie die dä
Ruedekappes kauche däte, äwwe do woe och nex besonderes. Eenes Daachs moot se
met em Feld hellefe. Se stallt vüehäe däe Ruedekappes op däe Häed, däe soll
dann Metachs jaar sen. Wie se äwwe heemkoom, woe däe Kappes angebrannt. Net
ärch, äwwe me merk et doch. On datt jrad bej Ruedekappes, wo lehre Man suene
aparte Jeschmack hatt. Se hatt att jakeene Appetit, wie däe an däe Desch woe
konn. Komm hatt däe jett von dem Kappes jeiße hatt däe jesooht:
"Endlich däe Jeschmack von Motte seelisch". Däe Jeschmack hatt äe
üss jonge Joohre noch emme op däe Zong, däe Jeschmack hatt äe emme jesooht. Seng
Frau woe fruh datt se jetz datt Rezepp kannt. Ich weeß net, off se jetz däe
Kappes och su jekauch hätt, oder off däe Mann sich an ihre Kappes jewännt
hätt. |
|