Dä Äen es erömm, die Daach were emme kuete. Wenn et Wedde och schön es wie em Somme, de Blaade falle von dä Bööm, die Vuggele sen fott jetrocke, et es Herres. Et jeeht op Allesieele aan. Dann denk me aan die Duede, aan all, die me jekannt hätt, üss dä Famellich, üss dem Dörf, aan Verwandte on Bekannte. Me wieet jo su off aan dä Dued jemahnt. Männicheene waad drop, annere reichene domet. Männichmool kött Äe äwwe janz onvehoff. Äe höllt die Mensche metze üss demm Läwwe, datt se jrad aanjefange haan, wo se noch su nüedig wäere.

Ich moot ze Öskerche von 8 bes 9 Uhr op ne Bus waade, Dann kann me noch nerjens joohn, de Kerch woe äwwe att op. Do woe jrad en Duedemess. 15 bes 20 Mensche, schwatz aanjedoon, dann och noch su vell Kenne, en Schollklass, 13 bes 14 Joohr alt. En senge Präddich sprooch Pastue von Waldemar, däe su fröh jestorwe wäe, op eemool koom ne richtige Schrej, Et woe die Motte, die konnt ihr Leed nemmie zeröck haale. Die Verwandte sooten, se soll stell sen, ich meene äwwe, me soll eene üsskriesche losse, ses krejt me ne Knubbel op de Bross, däe nemmie fott jeht, Ich haan noch füe die Eltere jebädd, datt se met ihrem Leed fäedich wäre solle, haan mich äwwe och jewonnet, datt su wennich Löck en dä Kerch woere.

Do merk me dä Onnescheed zwesche Stadt on Land. Om Dörf es seche net alles ideal, beim Bejräwniss merk me äwwe doch, datt me zesaame hüet, Och wenn e Kend sterv. Wie Monika, 5 Joohr alt, jestorwe es, woe datt kleen Jraav bahl voll Bloome. Beim Bejräwniss jeht jede met, däe kann, Vüe dä Duede es datt die letzte Iehr, denn Verwandte zeech me domet seng Anteilnahme. Me sööt domet, an dengem Leed kann ich nex ännere, Ich denke äwwe an dich on bädde füe dich. Männicheene sööt, watt notze die Mensche bejm Bejräwniss, et kann doch keene hellefe. Datt Jeföhl, die Mensche denke an dich, hellef eenem doch, Et es su, als wenn me sich aan eenem fass könnt haale, als wenn me sich op eene stütze könnt, Et es ne jrueße Onnescheed, off me bei sengem Leed alleen es oder off anne Löck met eenem truere. Et Leed es noch do, et hätt äwwe net mieh suen schärf Ecke on Kante. Et lött sich jett lieechte droon.