Menschen von heute |
|
Jede Mensch es annesch Et jeng op dä Strooß, Mariche vom
Noobesch Dörf. Jett jeböck, wie Löck joohn, die schläech seehn; ne Steckel,
füe sich drob ze stippe, wo me och ne Hond met fott jare kann. Füe datt kalt
Wentewedde janz praktisch aanjedoon. Stewwele, die ens eene affjesatt hätt,
die äwwe noch jot Deenste doon. Öwwe ne wärme Lodenmantel ne Rähnmantel, däe
hält Schnie on Wend aff. Dä Kopp, wärm on wassedich enjepack. Ich jlöwe, met
däe Montue könnt me aan dä Nordpool joohn. Mariche moss op seng Jesondheet
oppasse, et dreht nämlich de Zeidung üss. Em Fröhjoohr on em Somme es datt
keen schläech Ärbed. Em Härres, bej Rähn on Sturm, em Wente bej les on Schnie
es et net eefach, met 75 Joohr die Zeidunge jede Morje en die Huuse ze
bränge. Trapp eropp, Trapp eraff, von eenem Enn bes zom annere Enn em Dörf.
Datt es Frühsport met alle Schikane, met Hindernisse on Rutschpartie. Mariche hätt et net lieech jehatt em
Läwwe. Et moot von Kend aan met ärch wennich üsskonn. Dann wieet me komisch.
Et es üssjelaach on veräppelt woere. Dobej wieet me freich. Su kann et och
sen. Et krejt en janz kleen "Rente" vom Staat. Dobej dreeht et de
Rundschau üss on botz Telefonhüsche. Sittdämm vöölt et sich bahl wie ne
Beamte. Jetz wo et jede Moond Jeld krejt. En dä kleene Wahnung hätt et och ne
Fernseher. Wie et sööt, woe däe janz bellig. Äe dät et äwwe noch jot. Em
Somme sammelt Mariche sich em Bösch et Brennholz. Datt deet et met dä Schupka
heemfahre. Dä stiel Berg eropp, en schwer Ärbed.
Debej koof et sich bej Fritz noch Brikett. Wann se "Jehalt" om Konto
es, bezahlt et die. Et bränk datt Jeld sellewe bej Fritz. Et deet dann met
eiße oder met Kaffee drenke. Suene dankbare Jast, demm et su jot schmääch,
hätt Anna net off. Loofe kann Mariche wie ne jonge
Mensch. Zehn bes 15 Kilometer machen em nex üss. Et es schmaal on dönn. Et
hätt seche e jot Hätz. Vell Autofahrer kenne et on holle et e Stöck met, wann
et sich maache lött. Dadröwwe freut et sich. Füe de Bus jet et wennich Jeld
üss. Die Zeidung dreeht et jetz 13 Joohr.
Wie et se zehn Joohr jedroon hatt, es et dafüe bejm Verlag ze Kölle jeeht
woere. Datt wäe su schön jewäes. Sittdämm hätt et em Kopp, et könnt die
Zeidung och 20 Joohr droon. Et wäe dann 83. Off datt klapp?
"Ich schaffe datt", meent et. Männich eene laach öwwe Mariche,
männich eene höllt et net füe voll. Et kann äwwe och eenem jett liiere. Wie
me met wennich üsskött, wie me emme jode Mot behäält on wie me sich öwwe
kleen Saache freue kann. Datt soll ens eene em no maache |
|
Dä Handkuss Ens vekoof ich Lose füe ne jode
Zweck. Do soot ne Ausländer: "Wo sein rote Lose? Ich sein Kommunist!'
Ich soot, die Lose wäre all jett schwatz. Räechs on lenks wäre die Niete,
metze dren wäre die Jewinne. Dobej rösselt ich die Lose jot dörchenanne. Dä
Mann soot, männichmool wäe et äwwe och ömjekieet. Do haan miee zwei ens jot
jelaach. Miee hatte oss vestanne. Dä Mann woe Kroate, woll äwwe net
Jugoslawe jenannt sen. Ich frooch en, watt do füe ne Onnescheed wäe. Äe moot jett öwweläje, datt wäe jo net esu eefach. Dann soot äe,
ne Schlesier wöll jo och keene Pole sen. Späde soll ich füe dä Kroate, däe e
janz stiev Been hatt, e Jlas Jlühweng holle. Wie ich datt bräch, lach äe
veschmitz on soot, dat wäe füe mich. Ich moot mich jrad bej seng Kumpane met
an dä Desch setze, Männ von 40 bis 50 Joohr. Menge Ausländer on ne Mann üss
dem Kollepott hatte politisch janz veschiedene Menunge. Se woere wie zwei Hahne, die eene demm annere de Feddere üssrisse. Wie se
ieh Parteie met Aape tituliete, wue et miee ze ärch. Ich soot, met Fanatiker
dät ich net spreiche, met Mensche jäe. Die zwei woere dann friedlich. Ich frooch dä Mann üss dem
Kollepott, wie et en dä Eifelhöhenklinik wäe. Äe woss em Moment net, wie äe
datt soon soll. Dann joov äe op meng lenk Hand ne
Kuss on soot, su schön wäe et do. Datt jefeel demm Kroate, däe an dä annere
Sitt sooß, net. Äe joov miee op die räechte Hand ne Kuss on soot: "Aber
nicht für Klinik. Nur für Frau, Dame oder Muttchen." Seng Motte woe noch
net lang duet. Ich jlöwe, äe hatt Heimweh. Wie ich jeng, sooten die Kumpane:
"Auf Wiedersehn." Der Kroate soot: "Immer nur Gutes." Bej
däe Veranstaltung sen ich op menge aahle Daach noch an ne Handkuss konn.
Sujar an zwei. Me häält et net füe müjjelich. |
|
Och en Kleenichkeet kann widde joohn Ens woll ich telefoniere, hatt äwwe
keen Jrosche. Met 5 Mark konnt ich nex aafange. Ich frooch e paar jonge
Mädche, off eene miee datt Jeld wäeßele könnt. Konnten se net. Eent schenk miee äwwe 2 Jrosche, keene jrueße Wäet füe mich,
äwwe ärch wichtig. En anne Tour hatt ich en Tass Kaffee
bestellt on konnt en dä Opräjung me Portmonee net fenne. Do bezahlt ne fremme
Mann dä Kaffee. Wie ich dafüe danke woll, soot äe: "Nicht nötig. Bei
Gelegenheit weitergeben." Dä Satz hätt miee jot jefalle. Wann me en
Jefällichkeet stracks zeröck jet, es et keen Jefällichkeet mieh. Me soll se
aanholle on bej Jeläjenheet widdejänn. Et woe ens op ne Scheffstour. Am
Büfett stonn en lang Schlang von Fraue, die all en Tass Kaffee on e Stöck
Kooche füe 4 Mark holle wolle. Wie die Frau füe miee die 4 Mark erüss holle
woll, krech se ne ruede Kopp on woll an miee vorbej zeröck joohn. Ich frooch
se, watt wäe. Se soot, se hätt ze wennich Jeld. Ich joov ihr 4 Mark on soot:
"Bei Gelegenheit weitergeben." Die Frau dank met Träne en dä Ore on
konnt dobej noch laache. Veliech jeeht die Tass Kaffee, die ich füe 7 bes 8
Joohr widde jejänn haan, noch emme widde. Met Kleenichkeete wieet et
männichmool fröndliche, e jot Woet wirk off Wunder. Bejm letzte Enkoof soot
eene füe mich: "Bitte, Sie haben Vorfahrt." Do haan miee zwei ens
jot jelaach. Do kann me och soon: Bitte weitersagen." |
|
Jod eiße on drenke es noch kee Fess Et jet höck vellelei Feste. Jede
Verein, däe jett op sich häält, hätt ens em Joohr e Fess. Wann en ner
Famellich ne Anlass es, wieet e Fess drüss jemääch. Dobej konn emme anne Löck
zesaame. Wann jong Löck fiere, konn Kollegen on Kolleginne, Frönde on
Bekannte zesaame. Bej nem 80sten Jebuetsdaach koom de Famellich zesaame, die
janze Sippschaft, die direkt oder indirekt met demm Jebuetsdaachskend vewandt
woe. Et soll e Famellijefess jänn. Watt es datt ejendlich? Jod eiße on drenke alleen es noch
kee Fess. Dobej hüere Mensche, die zesaame passe, die sich kenne, die sich
freue, datt se sich noch ens seehn. Dobej hüet, sich op de Scholle kloppe,
sich öm dä Hals falle. Dobej huet: "Weß due noch" on "Wie
jeeht et dir". En Party es jett
janz annesch. Do sen off Mensche zesaame, die sich nüüß oder net vell zu soon
haan, füe die et kalte Büfett et beiß an dä Saach es. Bejm Famellijefess konn
aahl Saache op de Tapet, Schellemstöcke üss Kennejoohre, Stöckelche von Jonge
on Mädche bejm Freje. Do wieet von dä Famellich on vom Beruf vezallt, do
wieet öwwe Freud on Leed jesprauche. Jeder jet jätt von sengem Läwwe aff on höllt von nem annere jätt met heem. Do merk me, dat
me zesaame hüet. Do woe ne Mensch, dä se all kannte
on jäe hatte, wäje demm se all konn woere. Se hatten sich all Zitt jehollt,
öm dä 80ste ze fiere. Do woere Jäss, die sellewe 80 woere, vell, die sich 20
bes 30 Joohr net jeseehn hatte. Datt woe en Freud. Datt woe et wäet, datt me
sich troffe hatt, su woeren se noch kens zesaame jewäes. Dä schöne Daach hatt ens e Enn. Äe
woe harmonisch affjeloofe. Datt es net selbstverständlich. Datt
Jebuetsdaachskend woe jlöcklich, die janze Sippschaft zesaame ze seehn, ze
seehn, wie fruh se alle woere. Die Aahle, datt se sich noch ens jeseehn
hatte, datt Mittelalter, die sich et mieesch vezallt hatte. Die jong Völeke
hatte jeseehn, wie jrueß die Famellich woe, waa se bej huete. Wann se och die
Jäss net all mem Name nenne konnte, su wäeren se doch noch lang aan datt
Famellijefess denke. |
|
Chreßdaach hätt vell Jesiechte Noch ene Daach, dann es Chreßdaach.
Die Kenne waade att lang dropp, die Jrueße wönsche, dä Daach wäe att jot
erömm, datt wiee alles normal wäe. Eene öwwelääch, watt äe noch alles jelle
moss, ne annere vesöök, met wennich Jeld noch ne jemötliche Chreßdaach ze
maache. Et jed Löck, die ja nex welle, wenn se bloß Ärbed oder en Lierstell
haan könnte. Kranke denke an demm Daach, off se wiee richtig jesond wäre. Dä
Daach sitt üss jede Sitt annesch üss. Äe wieet och op vellelei Art on Wies
jefieet. Eene verees, öm bloß nex von demm janze Rummel ze merke, annere
fiere dä Daach met dä Famellich oder met Verwandte on Bekannte. Et jet och
Löck, die sich ne besinnliche Chreßdaach wönsche, met Chreßmett on ner jode
Präddich, deheem Schallplatt oder Radio hüere on e Booch zu lesse. Chreßdaach es äwwe net bloß
Jeschenke jänn oder kreje. Aan keenem anne Daach denk me su vell aan dä Fredde,
net bloß en dä Welt, em Land on en dä Famellich. Me denk och dran, off me
annesch met eenem jett hätt, watt net janz richtig es, keene jrueße Stritt,
äwwe och Kenne richtije Frede. Et
heesch jo: Friede den Menschen, die guten Willens sind." Ich weeß von Löck, die Joohr on
Daach em Onfredde woere. Do holt eene sich dä Moot, sengem Noobe op Chreßdaach
de Hand ze jänn on e jot Woet ze soon. An
demm Daach konnt däe datt
net affschloon. Däe woe och fruh,
datt däe domm Stritt ze Enn woe. Datt
woe füe die zwei dä
schönste Chreßdaach sitt Joohre. Eene moot senge jode Welle zeje, datt äe et
ieeschte Woet soot, dä anne hatt äwwe och datt Woet ajehollt. |