Beobachtungen auf dem Land |
|
De Fenste sen do, datt me erüss kicke kann De Fenste sen do, datt me erüss
kicke kann, soot Steffe. Ich haan Jlöck, datt me Fenste op de Strooß jeht. En
kleen Dörfstrooß, wo dann on wann e Auto fährt, wo die Dörflöck eropp on
eraff joohn, wo Kenne drob spelle on wo Hond on Katz noch Plaatz drob haan. Die Strooß füe mengem Fenste es e
Stöck vom Dörf. Morjens fahre et ieesch die Pendler, die erüss ärbede fahre.
Ich kicke äwwe leewe, wann die Kenne do spelle. Em Wente bej Schnie mit
Jleitschoon, Schledde on Schniemann boue. Em letzte Joohr rötschte se mit nem
Plastiksack dä Berg eraff. Em Fröhjoohr konn de Rollschoon aan de Rejh. Dann
doon se och höppe on Seelche sprenge, noloofe, söökespelle on mem Ball
spelle. Spelle, die net üssstärwe, sich allenfalls veännere. Dann konn och
die Kleenste em Kennewaan on om Ärm op de Strooß. Dann treffe sich die jong
Fraue on freue sich, datt die Kleenste jetz jett lange an dä Luff sen konne.
Wann se 2 Joohr alt sen, balancieren se att aleen öwwe de Strooß, dann bruch
bloos noch eene opzepasse. Met 3 bes 4 Joohr fahre die Kenne
met jett, watt vier Rade hätt. Se konn jo all mit nem Führerscheng op de
Welt. Met 5 bes 6 Joohr fahren se mem Rad. Möchlicherwies es noch kens e
Mallör passiert. Op eemool joohn se en de Scholl. Dann jeht et flöck. Ich
meene, jrat die Schollzitt jeht su flöck erömm. Dann seehn se sich net mieh
su off, dann treffe se sich annesch em Dörf. Männichmool kennt me se bahl net
mieh, wann me se noch ens treff. Et sen dann stattlich Jonge on schön Mädche
woere, wo me sich dröwwe freue kann. Bei dä Kenne haan ich jeseehn, wie
die op 10 bes 15 Joohr en de Welt waaße. En dä Zitt sen annere jestorwe. E
paar kuet on flöck, höck noch fröndlich jejröß, am annere Daach duet. Bei
annere merk me doch lang, datt se krank woere. Se jenge emme noch jett
spaziere, äwwe emme jätt wennije, emme jett beschwerlicher. Datt woere die,
wo me an dä Duet dääch, wann me och net woss, wann äe koom. Männichmool haan
ich de Luff aanjehale, männichmool joov et ne Stech en et Hätz, wann et ne
jode Noobe, ne leewe Bekannte oder Verwandte woe. Datt es, watt ich üss mengem Fenste
jeseehn haan. Emme bloos 2 bes 3 Menutte, e Stöckche vom Dörf. Mensche, die
me kennt, e paar Joohr, oder 60 bes 70 Joohr. Ejendlich hüet datt jo all
zesaame. Jong on Alt, Jeburt on Duet. Eene kött, dä anne jeeht. Su woe et
emme, su wieet et emme bliewe. |
|
En Rundflug‑Entdeckung Datt die Römer en osse Jäjend woere,
sitt me an dä römischen Wasserleitung. Beim plööje on beim Jrawe hätt me och
aahl Fundamente üss däe Zitt fonne, e Zeeche, datt he och Löck jewahnt haan. Ens stonn en dä Zeidung, datt me
männichmool üss nem Flugzeug seehn könnt, wo suen aahl Fundamente sen. Die
könnt me onnet ner Erdschicht seehn, wie me bei nem Röntgenbeld die Knauche
seehn könnt. En dä Zeidung woe e Beld von ner Zirkusarena, die se su entdeckt
hatte. Do woere Kreese, eene emme jruede wie dä anne. Me konnt jot seehn,
datt dat en Arena woe. Füe suen Saache interessiere ich mich, drömm hatt ich
miee datt Beld jot aanjeseehn. En däe Zitt määch ich von dä Dahleme
Benz ne Rundflug. Et woe Fröhjoohr, de Soot wo erüss, alles wo schön jrön. Op
eemool veel miee jett ob. Do wo ee Feld, do woere jenau suen Kreese wie op
demm Beld en dä Zeidung. En eenem Krees stonn die Fruech kräftig jrön, en
demm nächste Krees woe se net su schön, emme eene Krees an dä anne. Off ich
en Arena oder e richtig Amphitheater entdeckt hatt? Ich woss net, watt ich
denke soll on woe janz opjeräch. Ich hatt miee jenau jemerk, wo dat Feld woe. Die janze Weich haan ich an
"meng Arena" jedääch, watt do noch alles erüss könnt konn. Woo en
Arena es, woe doch och en Stadt, wann et keen jrueß woe, dann äwwe en kleen. Am nächste Sonnig konn ich dann
kicke joohn. Miee klopp et Hätz, wie ich aan datt Feld koom. Do moot ich äwwe
ens jot laache. Et ieesch öwwe dä Bue, demm dat Feld woe. Ärch akkurat woe
däe net. Däe hatt datt viereckig Feld met demm Kultivator eefach rond
beärbet, datt woere die Kreese, die ich üss demm Flugzeug jeseehn hatt. Die
jenau su woere wie op demm Beld en dä Zeidung. Ich moot äwwe och öwwe mich laache,
datt ich ditt on datt öwwelääch hatt, watt ze doon wäe. Schaad, et wäe su
schön jewäes, wenn do en echt römische Arena jewäes wäe. Jelaach haan ich trotzdämm.
Datt doon ich höck noch, wann ich dra denke. |
|
Schlööf datt alt Huus oder sterv et att bahl? Datt es Steffe, se Elternhuus, met
et ääls Huus em Dörf. Ich weeß net, wann et jebout woere es. Et es höck noch
su, wie seng Eltere 1895 dren jetrocke sen. Datt Huus pass dumols jenau op
Steffe seng Eltere. Et looch kleen on jeduck aan sengem jrueße Noobe. Datt
jrueß Huus heel vell Sturm on Schnie aff. Dumols huet och datt Hüsche met demm
Hätz debej, wie et höck noch ze seehn es. Em Herres on em Wente woe et dodrop
jot onjemütlich. Et rähnt dooren on männichmool moot me ieesch de Schnie vom
Brett doon, ieh me sich setze konnt. Su woe datt dumols. Vüe demm Hüsche met
dem Hätz woe fröhde noch de Moss. En demm Stall woere jo zwei Köh, e Kalew
oder e Rend on en Sou. Och jett Hohne, alles Jediesch, wat Mess määch. Näwwe demm kleene Stall es de Schüe.
Alles su jrueß, wie et füe ne kleene Betrieb nüedig woe. En dä Schüe koom aan
een Sitt et Heu, aan die anne Sitt koome Fruech on Hawe. Ja su voll wue die Schüe net. Dafüe woere die Felle
zu kleen. Se hatte mieh Steen wie Äed. Do konnt net vell drob waaße. Die Huusdüe jeng en et Huus, ne Raum
su jrueß wie en kleen Stovv. Do woe fröhde ne offene Kamin jewäes. Steffe se
Motte hatt äwwe att ne jossiesere Herd. Do näwwe woe dä Backoefe, et Brued
wue jo en jedem Huus jebacke. Lenks jeng de Düe en de Kaame. Do schleefe de Eltere. Do woe e Bett, ne Stohl on e Schaaf. Räechs jeng et
en die Stovv. Dä Desch stonn an dä Fenster. Do henne woe en Bank, wo die drei
Kenne ihr Plaatz hatte. Noch zwei Stöhl, datt woe alles. Füe Tasse on Tellere
woe ne kleene, offene Wandschrank do. Em Huus
woe och die Trapp no Ovenobb. Aan eene
Sitt woe noch e Schloofzemme, aan dä annere Sitt dä Spiche. Weeß on Hawe
moote jo jelagert wäere. Räechs näwwe demm Stowwefenste hatt Steffe senge
Vatte de Werkstatt, äe woe Ääße, Stellmacher. Dumols woe die Düe och jruede. Do
konnt äe datt Jeschiee repariere, watt die Buere brächte. Dann onn wann joov
et och jätt Nöyes ze maache, äwwe selde. Die Löck woere all ärm. Bej dä
Meeste jeng me nue, wenn et onbedenk nüedig woe. Sulang Ääße Wellem Ärbed
hatt, jeng datt noch met dem Huushalt. Schmalhans woe äwwe emme en demm
kleene Huus. Datt kann me och en Zitt üsshaale, op eene Plaatz hüet et äwwe
ob. Wann die Köh net jenoch zwesche de
Reppe kreje, könne se et Feld net richtig plööje. Wann dat Feld net richtig
geplööch wieet, jet et enne schläechte Äen. Su wieet datt att emme schlemme.
Wann die Köh wennich Mellich jänn, kann die Frau nex Kräftiges kauche. Su
koom et, datt Steffe se Vatte net mie stärk woe, krank wue on storv, jot 40
Joohr alt. Noe stonn Steffe seng Motte do on
moot seehn, wie se met drej Kenne dörch koom. Dumols joov et keen Rente on
keen Sozialhilfe. Die zwei Jrueße konnte dann on wann bej dä Buere üsshelefe.
Do vedeenten se zwar net vell, konnte sich äwwe wenigstens satt eiße. Du koom dä ieeschte Kreech, 14‑18,
on Peter, Steffe senge Brode, wue Soldat. Äe es 1916 att jefalle. Seng Motte
krech jetz Waisenrente, et lank äwwe bloos von dä Hand en dä Zant. Die Nuet
es kens üss demm kleene Huus erüss jejange. Ääße Trenkche, wie Steffe seng
Motte heesch, hätt emme jode Moot behahle, wann et och bloos e kleen Mööhnche
woe, 80 bes 90 Pfund schwäe. Eenes joden Daachs es et jestorwe. Me drooch et
üss demm kleene Huus erüss, wo et bahl 50 Joohr dren jewahnt hatt. Wie die Motte duet woe, trook Steffe
seng Schwester met ihrem Mann en e anne Dörf. Jetz woe Steff alleen. Äe hätt
kens jehieroot. Vüe zwei Joohr es äe jestorve. Sittdämm steeht datt alt Huus
on waat, watt se met em maache. Kött noch ens eene, däe et parat määch oder
kött eenes joden Daachs dä Bagger on döjt alles op eene Hoof? |
|
Et Fernsehen kött en et Dörf En Jau trecke die Kenne met Äezebär
on Könijin Fasteloowend dörch et Dörf on sammele jot Saache füe ze kauche on
ze backe, wie et füe honnet Joohr att jedoon wue. Dä Brauch jet et annesch
nerjens. Drömm woll de WDR die Kenne bejm Ömzoch fileme. Ich woe jespannt,
wie Jau em Film üsssitt. Der Redakteur von dem "Kölner
Fenster" em WDR koom häe, öm ze seehn, wie he datt Dorf wäe. Ich soot
em, wie die Kenne dörch et Dörf trecke, wie datt emme jewäes es. Em Dörf
konnt äe dann die Huuse seehn, die em jot jefeele. 4 bes 5 sollte en dä Film
erenn konn. Watt heesch he Film, datt janze soll jo bloos 3 bes 4 Menutte
duere. Su vell konnt ja net dadren konn. Fasteloowendmonich woe schöne
Sonnescheng, et woe äwwe noch jot kalt. Die Kenne hatten att en velle Huuse
jesammelt. Se hatten all ruet Nase. Endlich woe datt Fernsehteam zesaame. Et
konnt loss jo. Dä Mann vom Fernsehen soot denne Kenne, wie äe datt jäe hätt.
Et soll Kenne Parademarsch sen, ne Knubbel wäe och net schön. Et ieesch wue
ens jeprob. Die Frau vom Huus hatt op nem kleene Desch die Saache für die
Kenne parat. Die Kenne koome, öm sich datt ze holle. Stracks klapp datt noch
net. Dann leef die Kamera. Em nächste Huus jeng datt att jett
flöcke. Dann koome die Kenne zesaame die Strooß eraff. Et ieesch die Könijin
met däm Äezebär, die Kenne met dä Saache en dä Hand. Ne schöne Zoch. Dann
wuere die Jonge met demm Äezebär jefilemp. Datt klapp flöck. Noch e paar
Huuse, on alles woe erömm. Die Fernsehlöck woere ärch zefredde, datt die
Kenne su schön met jemääch hatte. Zomm Schluss soll ich noch jett zo demm
Brauch soon on wie et domet widde jeng. Net eefach, wann datt bloos 20 bes 30
Sekunde duere dusch. Die Löck vom Film haan dann em
Kauchhuus jeiße. Äezezupp met Heffeplätzche. Die Heffeplätzche kannten se
zwar net. Se woere äwwe stracks bejeistert dovon. Se haan jeiße wie die
Schüeredreische. Domet woe et Fernsehen für Jau erömm. Jetz moot me affwaade,
watt dovon op dä Bildschirm konn soll. En 3 bes 4 Menutte kann janet vell
jezeech wäere, datt weeß ich. Et heel jo och dran, wellig Aufnahme et beiß üssjefalle
woere. Datt Janze woe doch zämmelich dönn. Die Kenne koome bej demm Zoch op
dä Strooß schön en et Beld, och, wie se die Saach en Empfang hollte. Datt woe
jot. Et woe äwwe ärch wennich. Dat Janze hat doch 2 1/2 Stonn jeduet. Et jeng
jo öm die Kenne on dä Brauch met Äezebär und Könijin. Ich hätt mie jewönsch, dä Film hätt
och osse Kerchplatz jezeech, met demm Kennejaade, met Pfarrheim, nem
Fachwerkhuus on oss Kerch, die noe werklich jett Besonderes es. Suen
Marmorblöck, wo die drüss jebout es, jet et em janze Rheinland ne mieh.
Vlieech kött et Fernsehen noch ens en et Dörf. Dann moss et datt nooholle. |
|
Watt es vekieet? Wann me spaziere jeeht, pass me net
emme ob, waa me jrat de Föß setz. Ens leef äwwe ne decke, joldige Käfer metze
op dä Strooß. Do moot ich doch kicke, datt ich net drob tredde dät. Dobej
sooch ich üss däe Teerstrooß e paar Jrashälemche waaße. En dä Teerdeck woere
kleen Ress, wo die Hälemche dörchjewaaße woere. Ne Schrett widde woe e
Büschel, do waren att acht bes zehn Hälemche. Op eene Plaatz woe en kleen
Bühl op dä Strooß, wie e hallef Ei. Jetz
weeß ich, datt do och ne Jrashalem waaße wellt. Datt kann me ejendlich ja net
vestoon. Die Teerdeck es zäh on schön deck, datt Jrashälemche Jans dönn on
feng. Watt moss do füe en Kraft on Ausdauer dren sen, ieh et sich ne Weich
jesooht hätt. Su ähnlich es et, wenn Wuezele sich
ne Weich sööke. Die sen och janz feng on waaße doch eefach dörch en Mue, wann
die em Wäech es. Bej oss es ne Ress en dä Strooß, 1
cm breet. Däe wieet jeed Joohr jett breede. Do dronnet es en Wuezel vom
Kaschteieboom. Dä Boom es att bahl 100 Joohr alt. Dann hätt ne Boom Kraft.
Datt kann me och om Nobeschdörf seehn. Do döjt ne Boom en Mue langsam erüss.
Die Mue hätt en Ossbuchtung von 5 bes 6 cm. Et duet noch jett, dann fällt se
erenn. Schaad, dann moss dä Boom seche fott. Ich haan ens ne Holunderbusch
jeseehn, däe stonn op nem Fels, wo bahl keen Äed woe. Dä Struch woe ärch von
Wend on Wedde zefleddet, äe woe ärch struppig. Trotzdämm woe äe 20 bes 30
Joohr alt. Su zäh kann ne Struch sen. Wenn me su öwwe Jraas, Strüch on
Bööm nodenk, merk me ieesch, watt die füen Kraft haan, wie zäh die sen. Watt
es dann äwwe loss, datt osse Bösch su krank es? Bööm, die zom Deel 100 Joohr
on noch ahle sen? Wiesu wäere die krank? Die doch su stark on zäh sen. Merken
die su vell fröhde, datt en dä Natur jät vekieet es wie dä Mensch? Sen en 30,
40 Joohr die Mensche och su krank, wie höck dä Bösch? |
|
Off se wiee all heem konn? Menge Jaade sitt emme annesch üss.
Em Wente es Schnie on Rief op dä Bööm. Em Fröhjoohr seehn ich do et ieeschte
Jrööne. Wann dann die Bööm blöhe, es jede Boom ne schöne jrueße Bloomestruuß.
Aujust/September kicke ich no dä Schwallebe. Öwwe dä Jaade jeht nämlich die
elektrisch Leitung, vier Dröht. Sitt 12 bes 13 Joohr passe ich ob,
wie die jong Schwallebe sich dodrop sammele. Die 30 bes 40 Meter elektrisch
Leitung sooße all die Joohre öm des Zitt voll Schwallebe. Ich hann op dä
Dröht off 70 bes 80 Stöck jezallt. Off se do die jrueß Rees plääne, die no
Afrika joohn soll? Männichmool meent me wirklich, se
dääten sich jet vezälle. Datt woe e Jezwitsche on e Flüjelschloons, als wenn
jong Löck zesaame wäere. Zweschedörch koome die aahl Schwallebe on bräächte
Foode. Dann resse zwar zehn Jonge die Schnabel op, ich jlöwe äwwe, datt och
do die Eltere ihr Kenne känne. Dann onn wann flueje e paar Schwallebe fott,
koome äwwe stracks wiee zeröck. Männichmool fluech dä janze Schwarm
wie op Kommando fott. Ich konnt se noch ne Orebleck seehn, wie se kreiste,
dann woeren se fott. No ner Zitt woe dä Droht wiee voll. Ich jlöwe, et woere
emme dieselben. Menge Mann on ich hatten emme os Freud dran. Anfang September, öm Maria Jeburt,
8. September, es dä Termin,. datt die Schwallebe fott trecke. Op eemool woe
menge Schwarm fott. Bloos e paar Nachzügler flueje noch erömm. Datt woere die
Eltere met dä Jonge üss dä zweite Brut, die jätt spät woere konn. Off die
noch Anschluss an ne Schwarm kreje, weeß ich net. Se konn suwiesu net all en
Afrika aan. Op däe Streck jett et vell Verluste. Schaad, en dessem Joohr woe keen
eenzich Schwalleb op dämm Droht em Jaade. leschtens sen em Fröhjoohr wennije
üss Afrika zeröck konn. Die Schwallebe konn emme en dat Dörf onn en dat Huus
zeröck, wo se ens woere. Zweitens woe dat Joohr füe die Schwallebe schläech.
Dä Somme woe kalt on naaß, dann jet et keen Fleeje on Möcke. Die ieeschte
Brut es doch bahl all vehönget. Et sen jo sujar Ahle kapott jejange. Füe die
zweite Brut, em Aujust, woe et Wedde och net jönstich. Die Ahle hann iehr
Möh, bes die Jonge satt sen. Jlöcklichewies sen em Dörf noch
Schwallebe, äwwe net su vell wie en normale Joohre. Wann die wennigstens all
no Afrika on zeröck kääme. Die Rees es schwäe, dat schaffen se net all.
Männichmool wäeren se och noch jefange, wel Schwallebe en Delikatess sen
solle. Schaad, datt me do nex dran maache kann. Ich wönsche osse Schwallebe
op iehrer Rees jot Wädde on vell Jlöck. Se solle doch em nächste Joohr dem
Dörf on dä Huuse wiee Jlöck bränge. |
|
Wäe net dren wellt hüere, kann drüsse bliewe Et
wieet off jestredde, wo hee em Norden de Eefel aafänk. Südlich es de Mossel de Jrenz, em Westen sen et die
Ardenne. Su witt wie hee em Norden die Berg sen, es och noch Eefel. Watt es
do noch ze öwweläje? Die Dörfe, die am Rand von dä Berg
sen, welle net bej die Eefel hüere. Die reichene sich bej et Neddeland, datt
es die Jäjend öm Öskerche on Zöllich. Die welle nex met dä ärme Eefel ze doon haan.
Datt die Eefel lang Zitt ärch ärm woe, weß jede. Die Mensche haan die Zitt
üssjehaale, die sen net loofe jejange. Waa sollten se och loofe joohn, en dä
Zitt woe öwweall Ärmoot. Die
Jäjend woe emme schön; wenn me äwwe Sörch hätt, pass me net dadrop op. Höck, wo et alle jot jeht, sitt me datt. Die Dörfe
haan sich jeännet, die konne sich seehn losse. Die Löck sen su domm onn su
schlau wie öwweall, janz normal. Die mieeschte Mensche, die häe konn, wesse
datt. Et jet äwwe och noch Löck, die meene, hee wäe die Welt met Brädde
zojenählt. Su eenem haan ich ens jesooht, wann äe do e Brett jeseehn hätt,
hätt äe datt seche vüem Kopp jehatt. Ich hoffe, datt demm se Brett eraff
jefalle es. Menge Ohm Wellem hatt ne schöne
Spruch füe Löck üss dä Dörfe, die su jrad am Rand von dä Eefel sen. Äe soot, die welle net
en de Eefel hüere, konne äwwe et Wasse üss dä Huusdüe en de Eefel schödde.
Wie eene en foppe woll, die Eefele däte ieesch, wie Katze, met 9 Daach de Ore
ob, hatt äe jesooht, wann se äwwe de Ore ophätte, könnten se jlatt dörch ne
Neddelänne kicke. Su wieet sich ömenanne jezänk, su
wie Noobeschkenne sich zänke. Ejendlich bruch me jo net ze frore, wo de Eefel
aafänk. Wäe net dren wellt hüere, kann drüsse bliewe. Datt es doch janz ejal.
Jeder es stolz op seng Heimat on meent, die wäe et schöns. Ich och. Dann on
wann kicke ich, wie et en dä Stadt es, oder ich maache en kleen Rees, 8 ‑
10 Daach. Dann hann ich jenoch jeseehn. Dann sen ich fruh, datt ich wiee
heem konn. En meng Eefel. |