Persönliches |
|
Et Alter hüet och bej et Läwwe Mich frooch
ens eene, wie alt ich wäe, wie datt su wäe em
Alter, oder off ich datt net soon wöll. Warömm soll ich net soon, datt ich
1912 jebore sen? Datt ich alt sen, sitt me, on bej däe Joohre es keent füe
datt ich mich schame moss. Net, als wenn ich alles richtig
jemääch hätt. Höck weeß ich, datt ich ditt oder datt annesch oder beiste hätt
maache konne. Ich haan et dumols äwwe su jedoon, wie ich meent, datt et
richtig wäe. Mieh kann me net velange. Wie bej ne Mensch die Jugend hüet,
su hüet och et Alter debej. Bloos, et wel jede alt wäere, äwwe keene alt sen.
Me kann sich noch su ärch dajänt stippe, datt notz nex. Do es et beiste, wenn
me sich fröh jenoch dadrop enstellt on et beiste drüss määch. Et es en Zitt
em Läwwe, wo me ejendlich noch ens en de Scholl mööt joohn. Watt me an
Venonef, an Jedold on an Einsicht noch net jelieet hätt, moss me onbedenk
nooholle. Dadroont jeeht et en jonge Joohre schläech, em Alter es datt noch
vell wichtije. Wann me dann, wie Adenauer soot, "die gesetzlich vorgeschriebene
Altersschwäche erreicht hat, meent me et ieesch, et jeng net widde, wenn me
net debej wäe. Me merk äwwe flöck, datt die jong Löck et jenau su jot,
männichmool noch beiste maache. Datt die jong Löck ditt on datt annesch doon,
es ejal, wann et bloos jot es. En jeder Zitt wieet jo annesch jeärbet. Bahl merk me, et es janz schön, ens
net mieh su vell ze doon, ens net füe alles sorje zu mosse, annere Löck die
Verantwortung ze öwwelosse. Off hätt me jemeent, et jeng net mieh widde. Höck
weeß me, datt männich schwer Saach jot affjeloofe es. Et es jot, datt me et
hennet sich hätt. Dat es datt Schöne am Alter. Me moss
äwwe och reichene, datt sich ditt on datt an Moläste enstellt, datt hüet och
debej. Meng Fröndin Elsbeth sööt: "Warum soll ich ausgerechnet davon
verschont bleiben, was den meisten Menschen widerfährt." Datt es ne
Satz, däe ich miee jot jemerk haan. Och datt Elsbeth öwwe die kleen
Mallörche, wo anne Löck sich dröwwe ärjere, su hätzlich laache kann, jefällt
miee su jot. Me es em Alter eefach net mieh su jescheck wie en jonge Joohre. Me vejess vell
Saache, me hüet on sitt net mieh su
jot. Wann me datt vüehäe enkalkuliert, kann me sich dadrop enstelle,
et bliev keene janz verschont. Papst Johannes XXIII. hätt ens
jesoht: "Johannes, nimm dich nicht so wichtig". Veliech hatt äe do
och Altersbeschwerden, oder hatt sich jeärjet, watt em doch och seche
passiert es. Dä domm Satz von nem Papst, däe ich wie ne Hellije veiehre, hätt
miee off jehollefe, wann ich annesch net jot zeräech koom. Wann me dä Satz
füe sich sellewe sööt on sich dobej mem Name ansprech, merk me, wie kleen me
es. Dann moot ich männichmool laache, wenn et miee och janet su am Liev woe. Am Alter konn äwwe och Saache, die
me net su eefach rejele kann. Wann eene krank wieet oder eene sterv. Miee
hätt dobej menge Jlaube an osse Herrjott jehollefe. Däe hätt miee jehollefe, met
Leed on True fäedig ze were. Ens kött
datt an jede. Et es net eefach. Su richtig alt sen ich noch net.
Datt moss ich noch affwaade. Ich freue mich öwwe jede Daach, däe net schläech
es. Domet konnt ich bes jetz jot läwwe. |
|
Dusch me füewetzig sen? Em Alter konn Moläste, die eenem et
Läwwe schwerer maache. Me vejess vell, me kann net jot joohn, me sitt on hüet
net jot. Bej eenem määch sich ditt,
bejm annere määch sich datt bemerkbar. Watt em Jrueße passiert, steeht en
de Zeidung, kött em Radio oder em Fernsehen. Watt en dä Famellich, em Dörf on
en dä Noobeschaff passiert, sööt eene demm annere. Bloos met aale Löck wieet
net su vell jesprauche. Datt es net emme Absicht, die Ahle föhle sich domet
äwwe zeröckjesatt. Die jong Völeke stoon em Beruf, se seehn on hüere, watt
passiert. Watt dä eene net weeß, weeß dä arme. Wann die zesaame konn, hann
die sich flöck jett vezallt. Wel die aahl Mensche off net jot hüere, konne se datt
net vestoon. Männichmool wieet äwwe och aan denn
Ahle extra langs jesprauche. Et heesch dann: "Die bruche net alles zu
wesse!' Die welle ja net alles wesse, Se wösste äwwe jäe, watt en dä
Famellich lööf, watt en dä Noobeschaff on em Dörf loss es. Se wössten och
jäe, watt et an Nöjichkete jet, wie sollen se annesch om laufende bliewe.
Wann keene met eenem kallt, moss me froore. Dann heesch et stracks, de sen
äwwe füewetzig. Als wenn datt en schlemm Saach wäe! Ich meene, leewe
füewetzig wie domm. Vüe Joohre woe em Fernsehen en
Sendung füe Kenne. Dodren heesch et: Wieso, weshalb, warum, wer nicht fragt,
bleibt dumm." Datt stemp. E Kend moss froore, wie alles heesch, wafüe et
jebruch wieet on wie et funktioniert. Wie soll et sich annesch en dä Welt
zeräech fenne? Dann es et jot, wen eene op all Froore en Antwoet weeß. Do haan die Omas off noch mieh Jedold wie die
Mütter. Kenne mosse froore. Datt jellt ömjekieet och füe aahl Löck. Wäe net
frooch, wieet domm, wenn äe och fröhde noch su schlau woe. Alles ännet sich,
vell Saache joov et fröhde ja net, do moss och ne aale Mensch froore, wieso,
weshalb, warum es datt su on datt su? Do moss me jede Daach jet Nöyes
lieere, ses wieet me werklich domm. Wim Thoelke hatt en ner Sendung enz en
aahl Frau, die 83 bes 84 Joohr alt woe. Keen Professorin oder su jett, en
eefach Frau, die öwwe vell Saache Bescheed woss, watt arme Löck net wesse.
Thoelke frooch se, wie datt kääm. Die Frau soot, se hätt sich emme jäe jett
Nöyes jelieet; se wäe emme füewetzig jewäes. Thoelke soot dadrop, se soll
bloos füewetzig bliewe, su lang, wie se noch jett Nöyes lieere wöll, wäe se
noch net alt, on wenn se 90 Joohr alt wäe. Datt stemp. Et jett su vell Nöyes,
wo me sich füe interessiere soll. Aahl Löck solle füewetzig sen wie
all die Mensche, die de Zeidung lesse, die Radio on Fernsehen hüere und
seehn, wie all die Mensche, die lieere on studiere. Die welle all jett Nöyes
hüere, die sen all füewetzig. Do es me doch en jode Jesellschaff. |
|
En Hand sööt vell Albrecht Dürer woe ne jrueße
Künstler, däe vell Belde jemoolt hätt. Ee Beld kennt jeder, die
"Betenden Hände". Datt sen die Hänn von senge Motte. Hänn von ner
aahle Frau, die vell jeärbet hätt. Die hätt Dürer als Künstler, äwwe och als
Sohn jezeechent. Äe hätt jed Oode, jed Sehn on jed Fahl jezeechent, me meent,
me könnt se aapacke. Su wie aahl Frauehänn sen. Affjeärbet, e besje wellig,
wie Bloome, die dä Kopp hange losse. Die Frau hätt dä Kopp net hange losse.
Se hätt zo ossem Herrjott jebädd, se hätt op däe vetrout. Drömm sen die Hänn
off op Duedezäddele; Vertrauen op osse Herrjott öwwe et Jraav erüss. En Hand kann vellelei. Jodes on
Schläechtes, Richtijes on Vekieetes. Ich meene höck äwwe bloos die Hand, die
me eenem jet, wann me eene lang net jeseehn hätt. Kleen Kenne hüere att: Jäff
schön de Hand." Die doon datt ja net jäe. Vlieech sen die bang, se
krechte die Hand net zeröck. Et könnt jo sen, datt eene die fass haale dät.
Suen Kennehand es jo werklich jett Schönes, mollig on wärm. Die jong Völeke maache sich et
bequem. Die soon bloos "Hallo" oder "Hey". Datt es
eefache, als sich de Hand jänn, ens seche, wenn ne janze Hoof zesaame es. En Hand
bedöck jo bej Fröndinne jett annesch wie bej Brutlöck. Wann fröhde eene e
Mädche hieroode woll, frooch äe die Eltere, off äe "die Hand der
Tochter" haan könnt. Bej die Hand hüet emme ne Mensch. Wann se hieroode,
velosse Brutlöck sich op die Hand, wo se dä Reng op dä Fenge doon, op die
Hand on dä Mensch, däe e janz Läwwe, en jode on schläechte Zidde, ene füe dä
anne do sen wellt. Et es schön, nem leewe, aahle
Bekannte no lange Zitt noch ens de Hand ze dröcke. Domet dröck me jo dä janze
Mensch. Me kann jo net jot jedem öm dä Hals falle. Menge aahle Pastue doot et
äwwe, wie äe mich 8 bes 10 Joohr net mieh jeseehn hatt. Die Hand, die me
eenem jet, die sich öm de Scholle lääch, kann vell bedögge. Do wäere och
Mannslöck mell wie Botte. En Hand zeech op dä Hemmel, wann eene ne Ed deet,
wann eene sööt: "Ich schwöre, so wahr mir Gott helfe!' Dä
Mensch, däe datt sööt, steeht met senge janze Kraff zo dä Hand on zo demm
Woet. Ens lött die Kraff no, die Hand
wieet emme schwache, bes se janz kalt es. Me kann se net fasshaale, me rnoß se laus losse. |
|
Me kann eenem flöck en Freud maache En keene Zitt wieet su vell
jeschrewwe wie füe Chreßdaach. Dann moss die Poss die Breef on Kaate
üssdroon. Op velle steeht bloos ne schöne Spruch, on 'Wünscht Datt es
ejendlich net, watt ich miee wönsche; e paar Sätz, wie et eenem jeeht, wäe
doch schön. Äwwe et hätt eene an mich jedääch, wenn äe och net vell
jeschrewwe hätt. Dä kleen Jrooß määch och Freud. Me kann och telefoniere, en schön
Saach, wenn me ens flöck jett affspreiche moss. Ens anroofe, wie jeeht et
dir, es noch alles jesond? Datt es jett füe flöck ze maache, wann me sich off
sitt. Äwwe ne Breef schriewe es jett annesch. Me moss sich Zitt holle. Dafüe
kann me dann och schriewe, wie et eenem öm et Hätz es, off me Sörch oder Leed
hätt. Wenn me dovon schriew, wieet et eenem lieechte, me meent, et wäe net
mieh su schlemm. Wann me dann öwwe Freud, schön on jot Saache schriewe kann,
määch datt Spaß. Wie schön, wann dann en Antwoet
kött. Ne Breef, däe jett öwwe dä Absender sööt. Woe äe fruh on zefredde oder
hatt äe Sörch on Leed. Männichmool hätt eene Schweres ze droon, an däe denke
ich on bädde füe däe. Et wieet seche e besje hellefe. Et jet och Breef, wo vell Freud on
Trues dren es. Die maache eene richtig fruh, och wenn me se späde noch ens
lesse deet. Ne Breef es wie e Jespräch, datt fott on zeröck jeeht. Datt es jo
datt Schöne dodraan, me kann en emme wiee erüssholle, wann me an dä Absende
denk, däe sich füe mich interessiert. Dann konn off Erinnerunge an fröhde,
jode on schläechte, aan dä Drömm und Draan, wie me die Löck kenne jelieet
hätt, wo me vell Spaß jehatt hätt. Bej miee let die Chreßdachsposs aan
dä Krepp, onnet mengem kleene Bömche. Die wieet Chreßdaach all noch ens
dörchjelesse, männichmool och zweimool. Wann die Mensche et all su maache,
dann treffe sich op eene Plaatz Jebädde, vell jot Jedanke on Wünsche, vell
schön Erinnerunge. |
|
Watt es ne Frönd wäet? En nem lange Läwwe lieet me vell
Mensche kenne. Do sen Mensche bej, die eenem ejal sen, me krejt keene
richtije Kontakt domet. Anne Löck sen eenem sympathisch, me merk, die denke
su ähnlich wie ich, dat sen flöck jot Bekannte. Me freut sich, wenn me sich treff.
Dann hüet me, watt loss es. Wie jeht es en dä Famellich, watt määch dä Beruf?
Op alles jet et en Antwoet. Net richtig von Hätze. Bloos suvell, wie me nem
Bekannte soon wellt. Wat me richtig denk on föhlt, kann me net jedem Bekannte
soon, däe eenem bloos sympathisch es. Dafüe moss me att ne Frönd oder en
Fröndin haan. Ne Mensch, demm me soon kann, watt me om Hätze hätt on watt e
Jemöt bedröck. Op ne Frönd kann me sich velooße, bej demm kann me et Hätz
üssschödde, met dä Angs on Probleme, die me hätt. Alles üssspreiche määch att
vell Saache eefache, dann wundert me sich, wie datt eene su bedröcke konnt.
Komisch, jede kann spreiche, äwwe sich üssspreiche es en schwer Saach. Dafüe
moss me och dä richtije Mensch haan. Wäe sööt att jäe, wie et eenem öm et Hätz
es. Jeder meent: doch, däe schaff datt. Ich hatt bej True on Leed ne Mensch,
met demm ich spreiche konnt. Däe och Verständnis füe domm Jedanke on janz
domm Angs hatt. Äe hatt emme datt richtije Woet füe mich, äe reef ze richtije Zitt aan
oder schreff e paar Woet. Datt hätt
miee jehollefe, met dä schwere Zitt fäedig ze
wäere. Do haan ich jemerk, watt ne Frönd es. Do es mieh wie
Sympathie, do kött noch Zuneigung bej, e Stöckche vom Hätz. Ich wönsche jedem, dann, wann et
nüedig es, suene Mensch, ne richtige Frönd. Me moss Jlöck haan. Me kann en
net met Jeld bezahle. |
|
Ens moss me alles
affjänn En
Bekannte soot ens: "Alles, watt me hätt, es jeborch, me kann et net
fasshaale, me moss et wiee affjänn." Öwwe däe Satz haan ich vell noojedäch, do es jett dran. Me
kann keene Daach on keen Stonn fasshaale. Me hätt jäe männich Joohr
fassjehaale, die Kennezitt oone Sörch, die jong Joohre, die su flöck erömm
woere. Och Kenne kann me net fasshaale, wenn et Hätz noch su ärch dran hänk.
Wenn die Zitt do es, maachen se sich selbständig on joohn fott. Su moss me
emme mieh affjänn, watt eenem em Läwwe lieb on wert woe. Wann me alt wieet,
moss me Ärbed on Beruf affjänn. Position on Einfluss kann me och net
fasshaale. Füe männich eene en schwer Saach, wo me sich fröh drop enstelle
moss, datt es flöcke do wie männich eene meent. Datt all haan ich öwweläww, met 76
Joohr hätt me att vell affjejänn. Watt met Jeld on Jut zu doon hatt, haan ich
jäe affjejänn, datt woe miee kens aan et Hätz jewaaße. On doch hätt ich velles jäe
fassjehaale. Datt sen Mensche üss dä Famellich on vell Jot Bekannte, die
jestorwe sen, die ich ärch vermesse. Ich meene, jede hätt e Stöckche von
mengem Hätz met jehollt, eene vell, dä anne wennich. Watt ich jetz noch haan, moss ich
och ens affjänn. Datt es Kraft on Jesondheet, körperliche, äwwe och geistige.
Eene hätt se lang bes zo sengem Duet, anne Mensche mossen se fröh affjänn,
lang ich se sterwe. Wie et met miee jeht, weeß ich net. Ich freue mich jetz
noch öwwe jede jode Daach on danke dafüe. Ens moss ich äwwe och noch me Läwwe
affjänn. Datt kann me och net fasshaale. Noch en schwer Ärbed. Ich hoffe,
datt osse Herrjott miee dobej hellef. Dafüe bädde ich. |